Ambasada britanike i dhuron donacion katër dronë Policisë së Kosovës

Zëvendësdrejtori i Policisë së Kosovës, Fehmi Hoti, dhe ambasadori britanik në Kosovë, Jonathan Hargreaves, kanë nënshkruar një marrëveshje për pranim-dorëzimin e një donacioni të rëndësishëm për Policinë e Kosovës, si pjesë e bashkëpunimit dhe partneritetit të vazhdueshëm.

Marrëveshja përfshin dhurimin e katër dronëve, të cilët do të përdoren nga njësitet policore për raste të ndryshme, duke përfshirë identifikimin, gjurmimin, monitorimin dhe përcaktimin e vendndodhjes së automjeteve dhe personave të dyshimtë. Këta dronë janë të pajisur me imazheri të rezolucionit të lartë dhe aftësi termale, të cilat do të ndihmojnë njësitet policore në marrjen e vendimeve të bazuara në informacione, fotografi, xhirime dhe prova.

Policia thekson se këto pajisje të specializuara do të kenë një ndikim jetësor dhe do të kontribuojnë në rritjen dhe profesionalizimin e punës së saj, veçanërisht për njësitet kufitare që kanë për detyrë parandalimin e krimit transkufitar, kontrabandës dhe migracionit të paligjshëm.

“Policia e Republikës së Kosovës falënderon Ambasadën britanike në Kosovë për mbështetjen e vazhdueshme, ndërsa ky donacion do të përdoret për ruajtjen e rendit dhe sigurisë publike, patrullimin kufitar dhe ofrimin e një shërbimi sa më efikas e cilësor për qytetarët dhe vendin”, thuhet në njoftim.