Maqedonci takon gjeneralin Clark, e informon për arritjet e FSK-së

Ministri i Mbrojtjes, Ejup Maqedonci, ka pritur të enjten në zyrën e tij gjeneralin Wesley Clark, ish-komandantin e forcave të NATO-s gjatë ndërhyrjes në Kosovë.

Maqedonci e ka cilësuar Clark-un si një “mik të madh të Kosovës” dhe ka rikujtuar ndihmën e pazëvendësueshme të NATO-s që çoi në përfundimin e luftës dhe çlirimin e vendit. Ai theksoi se takime të tilla sjellin emocione dhe janë një kujtesë e periudhave të vështira dhe angazhimit të përbashkët për liri. Maqedonci theksoi se, ndërsa luftonin kundër kërcënimeve për vendin e tyre, ndihma ajrore nga NATO ishte vendimtare për përmbylljen e luftës, dhe përmendi rolin kryesor të gjeneralit Clark në komandimin e operacioneve ajrore që ndryshuan përfundimisht fatin e Kosovës.

Gjatë takimit, ministri e njoftoi Clark-un me zhvillimet pozitive të Forcës së Sigurisë së Kosovës, duke theksuar profesionalizmin dhe përparimin e saj falë bashkëpunimit të ngushtë me partnerët ndërkombëtarë.

Maqedonci shfrytëzoi mundësinë për të shprehur mirënjohjen e popullit të Kosovës për udhëheqjen e fushatës ajrore të NATO-s kundër forcave ushtarake të regjimit serb, ndërsa e informoi gjeneralin Clark për përparimin e Forcës së Sigurisë në realizimin e objektivave të transicionit, sipas planit të miratuar.