Osmani: Kosova mund të zbatojë marrëveshjen e Brukselit nëse merr mbështetje ndërkombëtare

Presidentja e Kosovës, Vjosa Osmani, shprehet se Kosova është e gatshme të zbatojë marrëveshjen e Brukselit dhe aneksin e Ohrit në mënyrë unilaterale, nëse partnerët ndërkombëtarë ofrojnë garanci për njohje dhe anëtarësim në organizata ndërkombëtare. Megjithatë, ajo thekson se ende nuk ka marrë përgjigje të qarta për këtë çështje.

Osmani vëren se pa një akt juridik nga Qeveria e Kosovës për draft-statutin e Asociacionit të propozuar nga BE, asnjë procedurë nuk mund të nisë në Gjykatën Kushtetuese.

"Kjo është një qasje që e kemi aplikuar më parë, në vitet 2007-2008, kur Serbia nuk zbatonte marrëveshjet. Atëherë, pavarësisht zbatimit unilateral nga ana jonë, kemi arritur njohje dhe anëtarësim në organizata ndërkombëtare," shtoi ajo.

Osmani thekson se nuk mund të kërkohet zbatimi i marrëveshjes nga Kosova vetëm, nëse Serbia vazhdon të tërhiqet nga këto angazhime.

"Marrëveshja ka vlerë vetëm nëse të dyja palët zbatojnë detyrimet e saj. Në këtë rast, Kosova ka marrë angazhime të rënda, por ato kanë kuptim vetëm nëse edhe Serbia i përmbahet marrëveshjes," theksoi ajo.

Osmani gjithashtu kritikoi veprimet e Serbisë për të miratuar ligje që synojnë juridiksionin gjyqësor mbi Kosovën, duke i cilësuar si përpjekje për të destabilizuar vendin dhe rajonin.

"Serbia nuk ka asnjë juridiksion mbi Kosovën që nga viti 1999. Këto janë taktika për të destabilizuar Kosovën dhe për të krijuar probleme për qytetarët tanë," përfundoi ajo.