Trajneri i Zvicrës përballë Serbisë: Tregoni respekt, jo si në Leskovc!

Zvicra do të përballet sonte me Serbinë në një ndeshje të vlefshme për Ligën e Kombeve.

Ndeshja do të zhvillohet në “Letzigrund Stadium” në Zurich, me fillim në orën 20:45.

Në këtë përballje do të jenë të pranishëm edhe tifozë serbë. Trajneri i Zvicrës, Murat Yakin, ka bërë thirrje që tifozët vendas të tregojnë respekt ndaj kundërshtarit dhe të mos përsërisin atë që ndodhi një muaj më parë në Leskovc.

“Duam emocione në fushë, jo në tribuna. Dua që tifozët serbë të tregohen me respekt. Shpresoj që kjo të fillojë që para ndeshjes, në mënyrë që të mos përjetojmë më ndërprerjen e himnit tonë kombëtar, siç ndodhi në Serbi,” tha Yakin.

Sipas njoftimit të policisë zvicerane, ashtu si në çdo ndeshje ndërkombëtare, ndalohet futja e simboleve dhe flamujve me mesazhe dhe sfond politik. “Forcat e sigurisë do t’i heqin ato, nëse është e mundur. E njëjta gjë u zbatua edhe në ndeshjen e parë në Serbi, kur forcat e sigurisë hoqën flamujt politikë individualë. Lejohen vetëm flamujt kombëtarë të Zvicrës dhe Serbisë,” thuhet në deklaratën e policisë lokale.