Vazhdimi i operacioneve policore në veri, Elshani: Asnjë pengesë nuk do të na ndalë

Veton Elshani, Zëvendësdrejtori i Policisë për Rajonin e veriut, pas arrestimit të Marko Dantiqit për sulmin ndaj forcave të KFOR-it në Zveçan, theksoi se operacionet policore do të vazhdojnë pa ndërprerje. "Nuk do të ndalemi në asnjë moment," u shpreh ai.

Elshani shtoi se për policinë është thelbësore të sigurojë prova dhe fakte të mjaftueshme përpara se të bëjë ndonjë arrestim. "Për ne është me rëndësi që çdo veprim të jetë i mbështetur në prova," tha ai në një intervistë për 'Info Magazinë'.

Gjatë bisedës, ai zbuloi se ka shumë raste të tjera të rëndësishme që janë në procesin e hetimit. "Kemi shumë arrestime të tjera dhe raste të ndjeshme që ndodhin në veri të vendit, të cilat janë po aq të rëndësishme sa ky sulm," shtoi Elshani.

Elshani gjithashtu theksoi se nuk ka asnjë zonë në veri të vendit ku policia nuk ka qasje ose ndërhyrje. "Kjo është me rëndësi për të siguruar një hetim të kualitetit të lartë dhe për të përmirësuar cilësinë e jetës në këto zona," tha ai.

Gjykata Themelore në Prishtinë ka vendosur që Marko Dantiq të mbahet në paraburgim për një muaj, pasi u arrestua në lidhje me sulmin e majit 2023 ndaj KFOR-it në Zveçan.

Vërejtje: Personi i përmendur në këtë artikull, sipas ligjeve të Republikës së Kosovës, konsiderohet i pafajshëm deri në vendimin e formës së prerë nga gjykata.